隔牆有耳:傳九月前娛圈無發展 老竇「遣返」英國 齊昕離港 有緣再見 - 李八方

隔牆有耳:傳九月前娛圈無發展 老竇「遣返」英國
齊昕離港 有緣再見 - 李八方

上星期投訴被媽媽唐青儀掌摑掀起禮賓府家暴疑雲嘅特首次女梁齊昕,日前曾經喺facebook宣佈,離開屋企過自己嘅生活,八方聽聞,佢喺呢段時間被老竇梁振英安排住喺一間酒店嘅Apartment,但噚日已經外遊度假散心,據聞梁振英向齊昕發咗最後通牒,如果九月前喺娛樂圈都冇乜發展,就要返去英國開學,唔畀齊昕再發演藝夢。

父母唔like接三級片

齊昕噚日喺Instagram,先po出喺機艙嘅相,其後留言話「有緣再見」。更打下tag表示「我是中國人」,但就未有透露自己去咗邊。其後佢又留言話要走嘞,更向佢啲朋友話呀,會一直記住朋友對佢嘅好,叫朋友若然處於困境,可以廿四小時隨時call佢,有啲不捨之情咁話:「I LOVE YOU guys.」
據八方了解,齊昕的確喺噚日出發外遊,但絕對唔係告別香江,而係獲CY批准離港散心。據聞齊昕喺舊年開始同老竇就住入娛樂圈講數,CY承諾畀一年時間佢,睇吓有冇發展空間,CY夫婦甚至見過齊昕嘅經理人鄭紹康㖭。點知齊昕早前卻盲舂舂接咗部三級片,令到父母好鬼唔Like,CY之後同齊昕講明,九月前喺娛樂圈若冇乜發展,係時候修心養性返英國開學。
八方噚日問過鄭紹康,佢證實齊昕去咗外遊散心;至於齊昕係咪九月要返英國開學?佢直認有呢個可能,但詳情要等齊昕返港後再傾。

李八方

mailto:[email protected]

齊昕噚日貼出機艙內照片,未知去邊度散心。