日圓貶值，櫻花盛開，今個復活節假期相信唔少人去日本賞櫻之餘，購買免稅品係指定動作。不過，費清上星期放假去大阪豪食豪買，喺關口排隊時，見到好多香港人陸續被關員「打回頭」。
＃血拼港客失預算
事緣係咁，好多日本達人同費清一樣，以前喺日本買免稅品後，去到機場一般海關唔會再查，更加唔會要求旅客真係交免稅表格。不過，今次費清發現關西機場，喺過完手提行李檢查，到出境護照檢查櫃位之間，多咗個關稅櫃位。
費清最初無留意，一支箭咁衝去出境櫃位排隊過關，點知排咗一陣，見到陸續有香港人被關員叫返去關稅櫃位。原來𠵱家日本當局可能執正咗，一定要買咗免稅品嘅旅客，先去關稅櫃位交番張免稅表格，有可能被要求檢查免稅品，做晒所有手續先可以去出境櫃位辦埋出境。好彩費清預留足夠時間登機，即刻跑去交表，再返去過關。最慘係嗰啲想過關之後再去免稅店最後血拼嘅港客，就大失預算。如果係趕飛機，排完再排，真係畀日本海關「玩殘」。費清唔知日本其他機場係點，但最好都係問清楚海關，以免排完又排。
費清 ＃要生計，也要生活 ＃毋忘初衷