建制派希望泛民「食住先」支持政改，被部份人認定「食住先」高危一族嘅民協立法會議員馮檢基，噚日就率先同基本法委員會副主任梁愛詩「食足全程」。但大家唔好誤會阿基轉軚，查實佢兩個係出席由全國工商聯房地產商會搞嘅午餐會，唔知點解畀面食足全場。
噚日座上客包括新民黨葉劉淑儀、行會成員羅范椒芬，兩位女士食咗幾碟餸就快閃，但坐埋一齊嘅阿基同詩姑，食到炸子雞呢個環節仍然邊食邊傾，坐足個幾鐘。
有乜咁好傾？阿基話同詩姐識咗好耐，席間不斷講房屋問題，向對方投訴好多建制派喺多個區議會，千方百計阻撓政府起公屋，民協點樣爭取都無計，引述詩姐同意房屋問題真係要認真處理。咁有冇講政改？阿基話呢啲場合好難傾政改，但就叫詩姐諗計仔還港人真普選。