如果謝拉持(圖)冇閃電被逐，利記或有機會平反敗局，繼續係今年最後一支喺英超嘅未敗之師，並保住續戰歐聯夢。
英超求快，出錯特多，所以好睇，一分鐘比賽，可以發生好多事；英超傳奇之一嘅謝拉特出場三十八秒，衝動犯規被逐，落井下石無謂。不過，應該係比賽生涯最後一次有機會代表紅軍，喺主場鬥宿敵曼聯，無傷無病，續先坐後備席，又見球隊處於劣勢，謝四心情可想而知；少帥羅渣士高調畀大隊長季後離隊，來季赴美國搵食，係辦公室政治又好，冠冕堂皇為球隊長遠發展也好，無可厚非，不過要謝四出場救駕，即出亂子，後者賽後公開致歉，負上全責，紅迷更痛。
送走大隊長要有好大勇氣，少帥羅渣士排陣創新，筆者一向讚賞，但今仗踢三後衞陣式，呢個近期勝利元素，賽後就被戰術大師雲高爾踩一腳。曼聯改回4-1-4-1陣，連勝前列隊熱刺及利物浦，主因兩翼側擊處強勢，加上利記今戰怯於對手箭頭朗尼霸氣，每要兩位中堅招呼，形成邊路防守空虛，係對戰關鍵之一。公仔廂評述員一說桑馬達唔慣踢右路，佢即爆破對手防線，以右腳入波，累紅軍左中後場嘅艾拔圖摩蘭奴孭鑊，羅帥呢？
利記，國際賽小休期後，即要回英超早場（四月四日），作客鬥聯賽六連勝嘅阿仙奴，非常惡啃；目前紅軍被第四嘅曼聯拋開五分，呢戰要求贏，否則季尾同熱刺及修咸頓，爭第五踢歐霸，對後兩者意義會大啲，紅軍還是專注英足盃重賽鬥布力般爭入四強。來季正式進入「後謝四」年代，利記前景會更好；除咗謝四外，禮拜日如非場邊擁躉勸阻，否則應該陪隊長攞紅牌出場嘅巴神，不應再留低。還有一個史達寧，近兩仗表現差勁，喊十五萬周薪，一定要留，還是高價放走？這類土炮翼鋒，喺英國代有人才出，唔少屬早熟早殘，新近有禾仔二十六歲，喊十萬鎊，雲格其實唔想留低。
謝四出場不足一分鐘被逐，或改變紅軍今季命運；同晚領頭羊車仔，喺侯城主場陷於苦戰，全靠門將泰拔高圖爾斯下半場喺數秒內三連救對手攻門，將功補過，反成車仔全取三分關鍵，將絕大嘅爭標優勢，帶到四月份賽程。英超四強呢個地盤，其他球隊唔易再沾手；要車仔喺穩字派嘅摩佬麾下，餘下九場波起碼輸三場被追上，當然唔易。但英超走得快，奇事常見，冠軍有二十六倍嘅阿仙奴同五十倍嘅曼聯季尾勢勁，「阿曼」不可能嘅任務，何妨玩一票？
波神
mailto:[email protected]