唔少退休高官愛做時事評論員，相當過癮咁評論時政，下一個或者隨時輪到做過教育局局長嘅官場老手孫明揚。孫公噚日出席「全國工商聯房地產商會」搞嘅午餐會，講者何顯毅本身係建築師，毫不客氣逐一數落前任、現任政府高官兼議員，批評佢哋喺房屋、土地供應等問題上失職，搞到𠵱家香港樓市畸形。
在席嘅孫公獲邀公開回應，話佢𠵱家只要有機會「乜都想講」：「我𠵱家好恨講好多嘢，以前做局長，面對班立法會議員，冇辦法，一定要客客氣氣，唔可以唔客氣，唔可以動怒，否則傳媒唔鍾意，但如果𠵱家再有咁嘅機會，我唔係報仇呀，我會將真相披露出嚟。」繼而佢就好無拘無束咁反擊何顯毅，話對方只係用今時今日嘅眼光去睇事件，認為佢要諗吓每個政策都有佢嘅客觀環境喎。