雖然呢，教育局局長吳克儉無乜髮型可言，而美甲對佢嚟講，亦都冇乜需要，但佢噚日去到元朗區訪問、參觀職業訓練局位於天水圍嘅青年學院時，對學員喺呢兩個範疇嘅學習特別關注，唔通「得不到的從來矜貴」？
話說噚日吳得掂喺職訓局主席陳鎮仁同元朗DO麥震宇等人陪同下，去到青年學院，了解學院點樣為中三以上程度青少年，提供互動學習環境，而佢喺學員上堂學髮型設計、專業美容例如修甲時，睇到格外留神，好似好感興趣喎。八方唔知吳得掂有冇興趣上吓堂，學吓新嘢，只知佢覺得年輕人各有唔同天賦同夢想，社會應該為佢哋搭建合適舞台，俾佢哋盡展所長喎。