相信擁有創業夢想嘅本地年輕人有好多，但係有勇氣同阿媽講「我要輟學」、專心搞生意嘅人應該冇幾多個。曾經歷極度窮困嘅中國，窮得要食番薯皮填肚，但係可以用一代人嘅時間，孕育好多創業新星。
被列入《福布斯》三十歲以下嘅年輕富豪姚欣宇，係中國最大規模即時通訊雲服務平台環信嘅創辦人，前年有外國大戶向公司注資三億人仔。二十四歲嘅姚欣宇話自己創業啟發竟然係駭客，又話自己冇後悔唔讀大學，到而家都係唔信中國嘅大學可以協助國家經濟轉型。呢粒初創新星，說話並非大口氣。經合組織（OECD）最新報告話，中國經濟最大死結，係人力資源趕不上經濟轉向。即係經濟轉向依賴創新科技，但冇人識去做。國內人口老化問題未解決，投資活動同儲蓄減慢，影響生產力縮減，長遠而言對中國經濟係一個計時炸彈。
報告又講到，中國前年投入研究嘅資金，佔國家生產總值2%，多過歐盟國同期嘅研究平均開支。但用得錢越多並非一定得，因為大部份嘅科研並非同現時發展中行業相關。
份報告又引述前年一份中國大學畢業生在職調查，發現好多畢業生發覺大學的主修科目知識，喺職場無所用；又俾公司認為「軟實力」唔夠，包括談判技巧同解決問題等等。OECD認為中國想經濟保持增長，教育問題唔可忽視。
C+B
本欄逢周一刊出