上一轉金融體系全球化，主要由國際大銀行主導，影響一般市民最大的，莫過於美國出口的劣質信貸產品，沒有信用的美國人成功得到不同類型的貸款，然後打包、化妝拿去全世界出售，中招者眾。不過次按泡沫後的QE手尾更長，美國瘋狂增加貨幣供應，大行或機構投資者取得平錢後，征戰全世界，令美元兌主要貨幣不斷貶值。
吼實歐洲ETF
我哋身處的香港，亦因為港元兌美元掛鈎，直接將QE帶到本地，令本地銀行同業拆息低企，造成一個個的泡沫。本地經驗係收入穩定、可轉嫁成本於客戶及財務安排恰當的企業，股價出現一浪高於一浪的升勢，如長建（1038）、電能（006）、香港電訊（6823）等等，可買得大注，又坐得放心，係投資組合理想嘅防守選擇。另自由行及中國資金大規模流入本港，推升本地物業市場的租值及估值，令本地REITs成為黑馬，例如我哋之前很喜歡的領匯（823）及置富（778），由2010年升到2015年初，回報都有三倍以上，這是雙重好消息出現之威力。
可是世界各國央行的貨幣政策正大倒轉，雖然我哋唔預期美國有能力大手加息，但美國開始收水係事實，而取以代之的係歐洲同日本，各位見到好多美企，包括股神畢菲特的巴郡，都發歐元債抽水，就知未來的資產泡沫應該會轉去其他地方。而家再去買本地同美元掛鈎的收息股或資產，難再有幾年前的防守效果，隨時俾人入球。反而，全球化亦方便咗我哋到唔同地區嘅交易所投資，既然本地欠缺產品，要挑選防守成員，點解我哋唔跟長實、唔跟誠哥走出去呢？歐央行已講到明，佢哋實行的第一輪QE，會玩到下年中，套用本地的經驗，買當地重歐元債的公用股，應有着數。如果覺得隔山買牛，好難挑選隻好嘢，選擇ETF產品都好，例如SPDR MSCI Europe Utilities UCITS ETF同iShares STOXX Europe 600 Utilities UCITS ETF DE，兩隻ETF追蹤的成份股大同小異，包括電網、發電廠、燃氣管道、廢物處理等等公用業務，當然記緊要同時對沖埋歐元。如果嫌對冲麻煩，就要考慮已對沖的ETF產品HEDJ或DXGE了。
唔少人話港股可以完全放棄，我就唔太認同，因為本地中細價股炒得㷫烚烚，估計與內地資金史無前例式來港有關。好多股票破位就抽升，例如早前係電台重點提到的阿里影業（1060），兩個星期就幾成回報，比起過去幾年死寂嘅氣氛，現時好得多，至少有本地炒友分到一杯羹，炒港股最重要鬥癲、鬥狠、鬥快，係一個決鬥場地，好難再坐得舒服咁玩。今個星期有兩隻心水炒股，其一係金蝶國際（268），市場一直視其為科技股，可惜主打的B2B業務，喺過去幾個內地的浪潮中未能受惠，下一浪雲端及大數據概念，似已佔一些先機，睇吓徐少春今次帶唔帶到金蝶上車喇。另一隻億和（838）都算係已經否極泰來嘅股，揸住好耐，一直賺少少嘅股，升穿2.29元再入，博賺多轉重估。
張士佳
註: 筆者持有金蝶國際及億和。