講開新地（016），做咗三十五年嘅老臣子蘇仲強原來靜悄悄離開新地一年左右，佢舊年已經過檔內房股合景泰富（1813）。
合景泰富其實跟新地好有關連，合景喺二○○七年中成功上市，新地太子爺郭基煇（Adam）都有份幫手，事關Adam喺二○○六至二○○七年喺美資投行摩根士丹利工作，因此有份參與合景嘅上市工作。聞說Adam爸爸郭炳江當年都有入飛認購。
之後，新地又聯同合景與另一隻內房股富力（2777）合作發展廣州珠江新城天匯廣場，此綜合項目包括住宅、寫字樓、酒店同商場，預計今明兩年陸續落成。
所以話呢，蘇仲強過檔合景係純粹夠鐘退休，然後搵過份工打發時間，還是另有任務，真係要佢先知。
蘇仲強離開前一直負責新地嘅南中國業務，以往新地舉行業績會，佢都有份坐喺台上。聞說佢喺合景主要負責幕後工作。