印第安韋爾斯網賽上周六上演咗兩場男單準決賽，上一圈爆冷力壓拿度晉級嘅加拿大小將華奧歷，唔能夠繼續殺手本色，以直落兩盤5:7、4:6輸畀「瑞士天王」費達拿。費天王順利打入決賽，對手就係同日淘汰咗梅禮嘅迪祖高域。去年今日，同一場地、同一個比賽，男單決賽都係費天王鬥迪祖；當時嘅贏家就係迪祖。呢個天王對決戲碼已經係歷來第三十八次上演㗎喇。