香港女乒近年出產唔少「小花」，今次就輪到只得十八歲嘅杜凱琹大爆發。佢喺上周五嘅德國公開賽女單首圈，爆冷贏完日本名將福原愛，周六夥拍好姊妹李皓晴，再喺女雙四強撼贏日本組合，可惜決賽就不敵東道主而屈居亞軍。
女雙決賽屈居亞軍
港女隊今次收起師姐姜華珺、帖雅娜，改派李皓晴同杜凱琹領銜出戰德國公開賽。雖然兩位「小花」分別喺女單首圈同十六強止步，但杜凱琹嘅表現就十分搶眼。佢喺首圈面對「瓷娃娃」福原愛，首次擊敗對手晉級，可惜之後輸畀中國削球手劉斐出局。不過，佢同日夥拍李皓晴出戰女雙四強，即刻就能夠收拾心情，以3:1大勝福原愛/若宮三紗子。
決賽對手係德國組合，其中一人係中國入籍球手單曉娜，最終杜凱琹同李皓晴以0:3輸波，但仍然為港奪得一面銀牌。見到杜凱琹兩度淘汰日本勁敵，女隊教練李靜當然興奮，仲大讚徒弟表現出色：「佢嘅節奏感掌握得唔錯，高速對抗嗰陣都能夠控制到擊球落點。最重要係關鍵時刻敢出手，睇得出佢心理上有好大進步。」
至於另一年輕女將李皓晴，之前喺女單首圈同樣不敵中國嘅車曉曦出局。世錦賽下個月喺蘇州開打，李靜就希望佢盡快重拾信心：「佢喺女單首圈就撞正中國球手，今次輸波無可厚非。」