上星期講過，見底，博反彈有三大要點：正股、藍籌、大價股。因為最穩陣一定會派彩。所以上星期揀咗平保（2318），上星期一推介，當日開市83.65元。出完業績之後，星期五收報92.1元，一個星期升一成。唔算係好巨大嘅回報，但係完美跑贏大市，先贏第一仗唔使輸士氣。
因為，反彈第一浪，基金必搶大價藍籌股。你博中細價股，好彩博中阿里影業（1060），同期升29%，但係唔好彩嘅中細價股係大多數，個市升三百點，你隻股跌緊，士氣影響大。而實際上，買阿里影業同博大市見底都冇乜關係。上星期本欄喺內銀、內房、券商、鐵路、A股ETF咁多個大價板塊入面，揀內險係咪正確？
買中資股與虎謀皮
內銀：建行（939）同期升1.9%；內房：中海外（688）升3%；券商：中信証券（6030）升6%；中鐵（390）升7.3%；A50（2823）升8%。買平保升10.1%，暫時對辦。大家可能會問：我跟咗高明買平保，而家先贏第一仗，係咪要沽咗佢換馬？本欄暫時未有其他建議，如果閣下有可以沽咗佢換馬；如果你冇，本欄建議繼續持有，因為市場覺得平保業績好，同埋高明相信A股今轉未炒完。平保向上冇目標價，但因應股價不斷調高止賺位，以現價計，止賺位會定喺88.7元，即係對上嘅高位，唔穿一路揸落去，再升再調高止賺價。咁樣見底買大價股，係咪心安理得過平時冇事冇幹衝中細價股呢？高明早喺三月十三日星期五開市時段，喺facebook度話覺得底已見。所以，記住like高明facebook專頁，同我一齊輕鬆撈底！
今個星期未必有咁輕鬆，因為星期四會有博鰲論壇，習總將會出席開幕典禮（本欄唔用開幕式，自由式咩）發表演講。據本報專欄國策解碼所言，市場料習總會公佈更多一帶一路消息，亦係今次A股事先炒起原因之一。唔識國情嘅無知港豬會話：嘩，你睇國家幾強大，習總出嚟再講兩句，A股仲唔炒上一萬點？仲有亞投行外交勝仗，中國好強大呀呀呀！
真正國情係：如果真係有堅料，「阿爺」會漏畀你班散仔？共產黨點起家唔記得咗？就當有好嘢，兩會嗰班利益共同體上兩個禮拜乜風都收晒，幾時輪到你？
星期四同兩會一樣，憧憬越炒，回吐越大。越近星期四，就越要將止賺價位定得更貼，甚至部份先食糊降低入平均貨價，斬纜要狠。買中資股，就係與虎謀皮，你同佢談戀愛，佢會食咗你。
高明
https://www.facebook.com/bigricetea
本欄逢周一刊出