小米創辦人雷軍有句名言：「颱風來的時候連豬都可以飛」，意旨最緊要順勢，噚日港交所（388）行政總裁李小加，就幽雷軍一默，借佢呢句說話形容「一帶一路」（絲綢之路經濟帶與海上絲綢之路）機遇有幾好。
「中國IT領袖峰會」噚日喺深圳舉行，主持人問李小加「一帶一路」係咪下一個「風口」，即機遇。曾自嘲廢話多嘅李小加，再次發揮小宇宙搞gag，話自己「是搞市場的」，唔鍾意豬，一係就牛（市），一係就熊（市）。不過佢作為監管者，「又是管風的」，豬、牛、熊都唔管。
咁「一帶一路」係咪「風口」先？李小加就好識做咁拋底一句「領導說是風口，它就是風口」。其實炒開股嘅都明白，一有風到，個勢順嘅話，就雞犬皆升，「一帶一路」概念股都炒咗一段時間了。