聯儲局上周議息，若用四字詞語形容，皆大歡喜最恰當。一方面儲局終於刪除耐心（patient）等待加息的前瞻指引，為加息清除最後障礙，對鷹派算有交代。同一時間，儲局卻大幅下調今年息口預測，暗示加息會嘆慢板，令市場釋懷，環球股市雀躍。由於儲局講明四月唔加息，加上耶倫暗示通脹未達標唔出手，利率期貨估計，儲局六月加息機會低，九月或十二月出手機會較大，今年加息估計一次起兩次止。
對港人而言，最關心當然是享受咗六年嘅超低息供樓期可玩多幾耐。本地賓卡估計，因本地資金非常充裕，加上金融海嘯期間，儲局減息香港無跟足，本港今年未必會跟隨美國加息。呢幾年誤信金管局支笛話息魔就到的上車族真係百感交雜。
歐元短期玩range
當然，過去十年利好樓市嘅因素開始逆轉，鐘擺遲早掉頭，等跌市的遲早守得雲開。問題是家陣百物騰貴，其他日常開支都升到無譜，早兩日消夜叫碟東風螺竟然盛惠兩百幾，樓價會否大跌是天曉得。
滙市方面，美國息魔遲啲先到，加上衝上一百點後有獲利盤，在好友止賺影響下美滙指數上周回吐2.4%，收報97.9。其中歐元表現較chok，上周三上下多達五百點子，當日曾反彈至1.1美元樓上，上周五收報1.0821美元。美國可能第三季尾先加息，美元短期料處大漲小回格局。其中歐元近期料會在1.05至1.1美元上落，可伺機逢高沽。
奇兵
本欄逢周一刊出