公民黨立法會議員湯家驊Ronny噚日喺電台節目透露，原來佢開始寫緊本回憶錄，其中一段會詳細記錄佢喺呢場政改中，對唔同事件嘅睇法。
Ronny話佢本回憶錄將會記錄佢從政十多年嘅生涯，起點會由○四年做立法會議員開始，但相當嘅篇幅，會花喺今次政改身上。至於幾時出版？Ronny話，唔會早於二○一六年喎。
Ronny又透露，自己都慶幸同黨意見縱然不同，都未有被個黨責罵，透露當年有本身係公民黨嘅學者，因為反對五區公投喺黨內被指罵，仲話呢班學者如今已經默然引退，呼籲黨內人士對「異見聲音」毋須「去到咁盡」反面鬧人，應該尊重人。