內地造假層出不窮，連號稱「國酒」的茅台亦不能免俗。茅台自稱於一九一五年的巴拿馬世博會取得金獎，大揚國威，從而喺內地有特殊地位。但近日內地傳媒搵番當時中國代表團的紀錄，其實茅台只係攞銀獎，而當時有三百幾個中國產品攞到銀獎，根本唔係甚麼巴閉事。
一九八六年，茅台酒廠在人民大會堂舉辦活動，紀念獲巴拿馬金獎七十周年，個個信以為真。茅台官網曾有介紹，「當年中國人被視為東亞病夫，茅台酒無人問津，代表在展覽結束時故意失手摔瓶，結果溢出酒香令全場震驚，大會要補發金獎。」好威！茅台去年又推出巴拿馬金獎百年系列收藏紀念酒，售價高達百萬人仔。而家真相被揭發，有買家話要告番茅台搞虛假宣傳。恐怕都好頭痕，難怪呢排股價升市時都要跌。
李可強