今年財政預算案成功以期望管理一招，谷起曾俊華嘅民望，如果大家好記性，就會記得預算案公佈前夕，突然傳出公屋免租一個月嘅派糖措施會取消，隨即惹起多個代表基層政黨不滿，紛紛要求政府唔好停止向公屋戶派糖，最終預算案揭盅，公屋戶繼續獲免一個月租。
空穴來風，未必無因。花生友八到，官場的確曾經想過撤銷公屋免租一個月呢項紓困措施，但提出向公屋戶「減甜」嘅人，卻原來係被外界認定代表基層嘅特首梁振英。
梁振英嘅支持者一向都以基層、左派支持者居多，今次竟然「一反常態」，建議撤銷代繳公屋戶一個月租金，唔怕得罪呢班支持者？聽聞梁振英要求「減甜」，係因為佢覺得，政府不如將公屋代繳租金嘅十一億元，用喺其他項目上，有人認為用意不壞，但帶來嘅問題卻好多。
試諗諗，只要公屋免租呢項每年「指定派糖」紓困措施落空，呢份預算案嘅紓困措施，基層仲剩番啲乜？直接派錢、電費補貼已經冇嘞，對基層來說，預算案嘅紓困措施幾乎同佢哋毫不相干，建制同泛民中代表基層的政團，就有足夠子彈，指控呢份預算案「厚中產、薄基層」。
如果抽走咗公屋免租嘅措施，泛民唔支持都係其次，但民建聯、工聯會呢兩個支持者主要為基層嘅政黨，如何向支持者交代呢？當日消息一傳出，擁有六票嘅工聯會便指，最多只能接受不向公屋富戶派糖，之後工聯會喺邀請司局長出席同長者嘅團年飯席上中，不斷明示、暗示要求政府勿減甜，其中喺梁振英出席的一場，不少長者均要求CY保留公屋免租，呢啲就係政治現實。
花生友