澳門賭業前景麻麻，難免影響銀娛（027），咁啱銀娛今年有新賭場酒店開張，認真係充滿挑戰嘅一年。不過所謂輸人唔輸陣，銀娛老闆呂志和今年初專登搵人設計兩款分別紅色與藍色嘅公司呔，等一班管理層戴起佢，顯得比較醒神，公司仲計劃遲吓送呢批公司呔畀股東同投資者㗎。
銀娛呢批公司呔上面印有羅馬數字花紋，由大冧巴至細冧巴，合共七個羅馬數字，即係一千、五百、一百、五十、十、五同埋一。
管理層話呢個設計冇乜特別意思，不過華華就覺得，呢個設計概念多多少少可能同賭場籌碼有些少關連。
上周四銀娛舉行業績會，幾位管理層都有戴公司呔，呂志和與阿仔呂耀東反而就冇戴，佢哋只係揀番紅、藍色嘅私伙呔，可能諗住有重要日子先同班員工一齊戴喇。