上周六嘅西甲同德甲，不約而同地上演咗一場「人球反擊戰」。先講西甲，馬德里體育會喺主場對基達菲場波，近年成日俾人嘲笑做「廢托」嘅王子費蘭度托利斯，入咗球炮彈式頭槌，係今年一月重返母會馬體會後嘅首個聯賽入球，亦幫助球隊以2:0勝出；至於德甲方面，「蜜蜂兵團」多蒙特作客漢諾威場波，亦都有被曼聯遺棄嘅日本中場香川真司大打爭氣波，貢獻咗一個入球一個助攻，帶領球隊3:2險勝。
由於文迪蘇傑喺上周中對利華古遜嗰場歐聯後受傷，馬體會今場就用費托踢正前鋒，佢果然大打爭氣波。開波僅僅三分鐘，就接應隊友左路開出嘅罰球，禁區內頭槌一頂，個波好似炮彈咁，飛過對方門將個頭頂入網。雖然呢球唔係佢重返馬體會後嘅第一球，之前喺西班牙盃都有波入，但聯賽就直至今日先至開到齋，而馬體會亦藉呢個早段嘅入球打起信心，再靠中場堤亞高文迪斯完半場前建功，提早鎖定2:0勝局。
費托炮彈式頭槌爆「基」
費托近年有幾兜踎，相信都唔使我求大俠再多講，大家有眼睇；喺利物浦天價轉投車路士，踢咗足足三季，表現都係唔掂，上年夏天，以為轉戰意甲，喺AC米蘭可以重生，點知只係踢咗半季又要走人。好彩喺呢個時候，馬體會終於出手救佢，我求大俠當時聽到呢個消息都舉腳贊成，因為佢喺呢度成名，好熟悉呢度嘅風格，仲有咁多球迷仲當佢係寶；一個球員想重拾番狀態，有時好靠球迷畀信心先得。
雖然返到嚟之後，狀態唔算大勇，但至少踢過幾場好波。今場賽後，馬體會教頭施蒙尼亦有鼓勵吓呢位前鋒：「佢踢得幾好，同隊友都配合到，但我相信大家對佢嘅期望再高少少。」
香川入球加助攻最「威」
費蘭度托利斯喺西甲攞晒彩，德甲亦都有一位英超棄將一吐烏氣，佢就係香川真司。呢位今季被曼聯賣番畀多蒙特嘅日本中場，喺上周六作客漢諾威場波又難得有正選，結果當比數1:1嗰陣，香川喺下半場貢獻一個入球，再助攻奧巴美揚梅開二度，最終帶領球隊險勝十人應戰嘅漢諾威3:2。同費托一樣，香川真司返嚟成名地後，都唔係球隊嘅必然正選，但至少上陣嘅機會多過喺曼聯，偶爾亦交到貨，希望佢喺德甲會越踢越好啦。
識睇，一定係睇足英台【英波Live】：
http://soccer.appledaily.com
http://bit.ly/engballlive