老廣特性，性器官粗口隨身，隨時侍候；亦為問候，LHGC炒蝦拆蟹助語詞以示友善、老友！
面書鋪上廣州老區雅荷塘民國小洋房，那頓無名私房菜式照片，不夠幾天，蕭曼
（ 廣州媒體朋友，介紹菜館元凶 ）微訊告知：「閣下透過香港那個媒介將訊息傳開？搞到何師傅好唔得閒，慕名者竟然跑到老巷雅荷塘，逐戶拍門問訊尋覓私房菜館……你哋香港冇好嘢食得咁交關咩？」
吹脹！香港貴……貴得離譜（都進貢了業主），夾冇保障一定美味。
內地食材衛生程度點會不叫人擔憂？竟然有人跑出來拍心口保證好食，不單止；食得過癮，兼唔死得！
條條為食大道，九廣直通車不用兩小時直達，誰不想試？
走一轉省城，吃一頓無名私房菜館稱心如意飯菜？都唔係咁易。點解？
祖籍粵東客家興寧，廣州土生土長，系出名店優師兼天份（與真正藝術家相同，純靠牛一樣朝9晚11，欠缺天資，徒然！）大廚何師傅太有性格；中午不煮（除非特別熟朋友）。晚上二樓一圍，地下兩圍，未訂位，Walk-in不收。週六、日全休。
放眼江湖具藝術家脾氣者眾，擁真知灼能者稀。老友蕭曼約飯聚：「老區簡樸老房子吃私房菜，閣下可會嫌棄？」
點會？正中下懷好唔好！
環境簡樸＋人氣低調=好好食？又未必。卻保證師傅得空間全心全意下廚。
軟硬合度，筷子夾起不會吊吊Fing具嚼勁馬蹄糕，輕甜合味，沒嚐高水準若此久矣。送嘅，優秀前點助饞嘴口水、增信心。
蒜菜炒鵝；以傳統未落油，熱鍋碌鵝手勢調理，濃淡平衡炒出春鵝肉嫩，入口傳神。
蕎菜火腩；春來數十天至春末才得吃蕎菜，炒火腩，粵菜必選，得好食材又能做得好，難。蕎菜爽不留衣、火腩皮脆肉爽，證明蕎菜極新鮮，那豬似走地Free Ranch跡近廣西北海海邊覓食成長肉質感人之海豬。
花椒肉排；以焦糖Caramel調理連骨微肥肉排，微辣香麻，棄用筷子以指夾之，食後齒﹑甲留芳，麻辣之Bling Bling久久不散。
還有好幾道菜，美味毋庸細表；然全雞湯渣，必須一提，湯煲過，一般鬆散難食。何師傅揀手食材一流，彈牙質感不滅，換另一個廚房，隨時即煮多一道上桌菜。
廚事完畢，廚師出場打牙骹研究食事，句句笑着問候娘親老母……蕭曼滿意告訴：「何師傅歡喜才會顯露真性情，下次訂枱有望。」