到太子大廈頂樓Sevva吃午飯，由入電梯到上到去坐低，都遇到老朋友或新相識，同枱吃飯嘅靚女A（銷售產品高手，係公司數一數二），周圍望一圈之後，仲話：「嘩，有好多名媛在此吃飯。」左丁山平時唔睇娛樂名人版，見到啲名媛都嗌唔出名，不談也罷。
食食吓，著名私人銀行賓架U行過，賓架U做財富管理三十年，初入行時俾上司吩咐為台灣闊太個女在香港搵實習生（internship）職位，為世家子搵補習老師，為從溫哥華回來嘅富婆搵菲傭，曾經覺得好無癮，認為有損佢嘅專業地位，做賓架唔係做阿四噃，做乜要服侍得啲大客咁緊要？於是膽粗粗向上司投訴，當然係被省到面懵懵。上司話：「你想年尾分花紅就最好聽命行事，呢啲闊客有大把銀行戶口，一出聲就有成打分析師、財務策劃師、證券經紀上門為佢地提供投資計劃。唔係我地銀行名氣大，各方面可以pull strings，兼夾服務周到嘅話，闊太做乜要俾生意我地！」
三十年後，輪到賓架U風騷咯，經常與闊太一齊行街shopping打高爾夫。咁啱靚女A有一位三十歲嘅朋友係賓架U手下嘅手下嘅手下，呢位朋友曾經向靚女A訴苦，話大老闆（賓架U）成日唔做嘢，出去行街，夥計就做到死死吓，放唔到工，世界好唔公道。左丁山為之哈哈笑：「唔駛嘈喎，三十年後咪輪到番佢返工當行街囉，如果未被炒魷嘅話。」
講起銀行炒魷，唔同人咁品，經濟大勢唔好，生意連續兩年無增長，就已構成炒魷理由，那管你過往做得幾辛苦，幾有貢獻。賓架D算硬嘢，在投行坐住部門MD位已有幾年，想話提拔下屬B，話明下屬B有潛力升級，點知下屬B敬謝不敏，對賓架D講：「我唔想做你個位咯，我好想轉去合規部（compliance），唔駛孭數。我若升上MD位，怕做兩年就要起身，到時仔細老婆嫩，點算好？做合規部有排做呀，未來十年八年都唔駛憂。」
賓架D聽完，唯有苦笑。其實佢個公子啱啱入大學，佢已經叫兒子搵internship，要去學習合規，乜唔係啫，各國政府當銀行係肥羊嚟劏，郁吓就罰款10億、8億美元，銀行梗係不惜工本，大肆擴大合規部，爭聘有經驗人士啦。