唔准用電話同上網廿四小時，有冇難度呢？明光社同香港基督少年軍搞咗個「全城褪網日」，喺嚟緊廿七號放學或放工後嘅廿四小時「褪網期」，參加者唔可以用電子產品，即係智能手機、平板裝置、電腦等上網，流動數據同WiFi都唔准用，目的係重拾人同人實體溝通。
明光社總幹事蔡志森話，𠵱家唔少人用手機用到無紀律，喺街會因為用手機而撞車，有啲仲沉溺喺電子產品同網絡，建議停用電子產品一日就好似節食咁，偶然停一兩日，對身體同個人關係都好。喺呢個「褪網日」，參加者要承諾當日做一啲同網絡無關嘅事，例如睇書、見朋友等。
早前匯基書院（東九龍）全校約七百人試玩，只有卅人完成，蔡志森話，可能廿四小時太長難度太高，而今次就有廿四間中學同七個社福機構參加。