噚日喺灣仔運動場上演嘅香港田徑系列賽男子百米飛人賽事，原來係香港男子接力隊成員今年在港最後一擊，可惜初賽同決賽都遇上超風速，佢哋惟有寄望六月重慶亞洲錦標賽再挑戰香港紀錄。
四名仁川亞運接力賽銅牌得主徐志豪、吳家鋒、鄧亦峻同蘇進康，噚日齊齊參加百米飛人賽；家鋒係最幸運一個，佢喺早上初賽冇超風速下跑出個人最佳時間十秒三九，佢話：「其實我想造到十秒三○，所以決賽時諗多咗，跑得唔好，希望六月可試吓接近香港紀錄（十秒二八）。」決賽就喺每秒二點四米嘅超風速下進行，香港紀錄保持者徐志豪以十秒三八得冠軍、家鋒以十秒四一得亞軍、鄧亦峻以十秒六五得第五，至於入唔到A決賽嘅蘇進康就以十秒七四得第十名，可惜今次成績並唔會登喺田總排名榜。
接力隊下月四號就會到洛杉磯集訓兼參加三站接力賽，然後直接去巴哈馬出戰五月世界接力錦標賽，爭取明年里約奧運資格。