見習生呢個禮拜爭氣做人，繼拜三晚谷草呂卓賢贏馬及吳嘉晉起孖後，呢日沙田先有黃皓楠第六場策「御鋒」開齋，第九場三班千二米，又有呂卓賢升格減五磅首日勝出告廐「陽明囍囍」，適逢今日3月21號係已故女見習騎師簡慧榆忌辰，難怪有網民話係師姐顯靈，庇佑師弟們連環報捷。
1999年3月21日沙田日馬第三場五班千四，簡慧榆騎「漢廷之寶」墮馬身亡，16年後之今日，第三場又係跑五班千四米，結果由華將黎海榮爆冷贏「中國好」。
講番呢日第九場，「陽明囍囍」增程首次跑千二米，閘前落飛着綠燈開跑，貼欄一放而回爆16倍冷win，五歲馬轉投告達理後已四捷，馬主百億富豪黃健華之子黃僑福冇到場，由佢貌似藝人梁琤之靚靚太太代拉頭馬。跑第二係大熱門「追風駿足」，此駒近四戰三次做阿二，黑到冇朋友，三、四名係「同個夢想」及「熊英雄」。
告達理說：「『陽明囍囍』自上仗拼後體重保持平穩，這是個良好現象，牠的狀態很弗，今場受惠輕磅之利，可以直領到底，呂卓賢亦騎得好，令馬兒中段可以回氣再上，力抗『追風駿足』來犯。」