如果你係球迷同時間又係網民，呢個禮拜真係忙，先係全城花生緊689狼隊一家內訌，疑似家暴與狼女出走事件，同期加插千四億起跑道風波，夜晚又要睇歐聯（巴塞隆拿對曼城），再睇歐聯抽籤結果，到今晚更加唔可以錯過就係雙紅對決（利物浦對曼聯），同埋西甲國家打吡（巴塞對皇家馬德里），唔好忘記，你仲要返工或返學，所以今周絕對冇得唞。
呢期歐洲絕對係大家焦點，先講足球，歐陸球隊完全趕絕英超於歐聯歐霸盃，再睇歐聯抽籤，其實你都可以剔走四至五隊，四月中雙巴（巴塞對巴黎聖日耳門）、雙馬（皇馬對馬德里體育會）絕對係過關良機，再串埋拜仁慕尼黑乃完美配搭。同朋友吹水，講開歐元持續疲弱（某大行仲話未跌夠），今明兩年乃歐遊睇波好時機，如果你有留意，不難見到已經有劈價歐洲航空公司機票出籠，但唔使急，類似嘢應該陸續有來，大家可以同身邊女人plan定行程，相信對方都冇乜抗拒，皆因連名牌手袋喺香港都要大減價，但都仲未夠歐洲平，女人點會唔心郁。球迷朋友話最好係兩對情侶出發，男嘅睇波，女嘅「鳩嗚」日頭進行分組賽，夜晚再轉組完成次回合。港紙𠵱家係好好洗，但係起機場第三跑道叫價一千四百一十五億元港元，金額已經夠買英俄超、西意德法甲所有球員（總額一千一百四十六億港元, 資料來自場邊筆記），香港人真係咁豪爽？
梁栢堅
填詞人+彩池人