巴西日前公佈咗最新一期嘅國家隊大軍名單，由於大衛雷斯、馬昆奴斯哥利亞同埋迪亞高泰達利都因傷退隊，所以巴西教練鄧加日前補選咗三個球員入隊，備戰嚟緊對法國同智利嘅比賽。新入選嘅中堅基比爾包列斯達喺一月加盟阿仙奴，雖然仲未企穩正選，但可能因為球會名氣大、曝光率高，喺呢輪國際賽期，就獲得補選入隊，有機首次為「森巴軍團」披甲。
除咗包列斯達之外，喺歐聯分組賽狂入波嘅薩克達射手雷斯阿祖安奴，同埋哥連泰斯後衞基爾施華都獲補選入伍。另外，喺舊年世盃幫巴西把關嘅門將施薩索拉斯，雖然佢喺世盃後宣佈退出國家隊，但佢今季喺賓菲加踢得幾好，所以最近轉口風，話如果鄧加有需要，都可以召佢，佢話︰「呢季幫賓菲加把關，令我覺得有望重返巴西國家隊。我覺得自己嘅反應仲好過以前，同埋我嘅經驗越嚟越豐富，更加成熟。」
識睇，一定係睇足英台【英波Live】：
http://soccer.appledaily.com
http://bit.ly/engballlive