當家陣大家睇新聞都可以睇到成身負能量嘅時候，難得有套香港電影可以令大家流眼淚，流番啲正能量嘅眼淚。《五個小孩的校長》入面，小朋友問咗大朋友一個問題，你有咩願望呀？搞到好多大人都唔識答。係喎，呢啲嘢好似真係小朋友專利。不過，戲中大朋友最後都講出咗埋藏好耐嘅願望，雖然通通都係睇嚟唔係好做得到嘅，但小朋友就聽得好開心，原來願望呢家嘢你夠膽講就已經贏咗一半。
大人世界嘅規限真係好多，譬如話做錯嘢就千萬咪認，撐得就撐，但難得最近有位球證畀咗黃牌之後，竟然主動向球員道歉。咁奇怪？話說上個星期，哈化柏林嘅賓哈迪拉入波後，立即戴上事先預備嘅蜘蛛俠面具，向住鏡頭瘋狂慶祝，結果就換來球證先生嘅一面黃牌！完場之後，當全場球迷睇見賓哈迪拉拖住位八歲小朋友周圍行嗰陣，先知道原來面具背後有個小故事。
Jannik係哈化柏林嘅忠實球迷，因為癌病要接受化療，所以佢要長住醫院。賓哈迪拉認識咗呢位生命力好強嘅小鬥士，就每星期都去同佢一齊扮鬼扮馬，兩個最鍾意就係扮唔同嘅superhero。有日，賓哈迪拉想邀請Jannik喺比賽日陪佢去球場。
「好呀可以去球場，咁如果你入咗波，可唔可以扮埋蜘蛛俠呀！」
「我好耐冇入波㗎喇。」
「你得嘅，你係超人嚟㗎！」
「咁好啦。」
「Yeah！」
比賽二十一分鐘，1:0，全場喝采，但有兩個人盡在不言中。
當球證知道咗Jannik嘅故事之後，就send咗個短訊畀賓哈迪拉：「根據球例，我係要畀黃牌你，但係你高尚嘅行為遠遠超越咗足球規則嘅界限，所以我要向你道歉，以及向Jannik致敬。」普通人可以有一百個願望，但對病人嚟講願望通常只有一個。開心過後，治療仍然要繼續，相信Jannik呢位小超人，應該已經充滿力量嘞。
KEYMAN
節目主持
電郵：mailto:[email protected]