女兒「反叛」，上網向全世界指控母親暴力對待，是否有病？還是父母有病？三字經有云：養不教，父之過。子女讀書不成，在外行為不符身份，在內與父母爭吵，尋且以利器自殘，當然令父母頭痛，但父母也許要檢討，是否「養不教」？
一位名人女兒，在倫敦政經學院讀書，成績不如理想，沒畢業便回港了。此女姑且稱之為女子L，上有哥哥是讀書天才，下有妹妹是精英尖子，唯有自己則是一位普通學生（an average student），能入名校已經不錯了，卻要追求一等榮譽以至博士學位，但家裏的期望很高，可能構成讀書的心理壓力很大。
女子L一位倫敦同學的母親係富太T，富太T對左丁山講：「唔好成日講人啦，人地承受好大壓力，又有病，讀書追唔上哥哥妹妹，有大把理由，傳媒成日對人不對事，係唔啱嘅，我好同情女子L嘅處境㗎！」
換轉在其他家庭，女子L可能仲會覺得輕鬆啲，但偏生於特別家庭，父母皆有宏願嘅家庭，咁就難搞咯，而且身體有病喎，似乎病在心理，俗語云心病還須心藥醫，父母倒不如送女子L到美國接受心理治療，多見心理分析師，或者會好啲。另一方面，涉嫌以「暴力」對待女子L嘅母親似已有躁狂症跡象，喺香港都要接受心理治療。
法國人可以容忍總統晚上獨自出外偷情、總統夫人與男友到東京渡假，認為好總統與壞丈夫係兩回事，不應混為一談，呢一點係法國人之特性，連英語國家都不能認同，英國首相與美國總統若犯上同類婚外情事件，一定釀成政治風暴。在中國人社會，更加唔得啦，此乃文化有別，國家情況不同也。中國傳統講究「格物、致知、誠意、正心、修身、齊家、治國、平天下」，政治領袖不能齊家，有家庭醜聞嘅話，政治里程唔會走得好長，傳統之齊家唔係講婚外情（古代名臣往往有三妻四妾），而係指家庭和睦，父慈子孝，家內和平無爭拗，子女無叛逆等等。今有人焉，識得講古有明訓：「天下有子女說不是之父母，沒有父母說不是之子女。」當然亦應該識得齊家治國之言。不過咁，老早就話送子女去英國讀書之人，心底裏恐怕與陶傑同一般意識，崇英貶中港，但陶傑坦蕩蕩，唔怕公開講，日日講，一啲人就忍住唔敢講。英國人會接受子女反叛嘅，學習吓英國國情，拋開中國國情教育，心理冇咁辛苦。