英國政府前排向國會交嘅香港半年報告被指出賣香港，不過英國自由民主黨黨魁、副首相克萊格（Nick Clegg）就拍心口話，得自民黨可以喺艱難時刻有能力從香港利益出發，支持港人。
克萊格前排出席自民黨春季會議，華人自民黨副主席杜淑真同埋該黨新星，今年廿五歲、香港出世、十一歲移民咗去英國嘅張敬龍都有現身。克萊格喺會上被問到香港政改立場時話，雖然代表英國去中英談判嘅前首相戴卓爾夫人，同埋末代港督彭定康都係保守黨，但保守黨喺香港問題上冇膽量同骨氣發聲，自民黨就唔同，仲話英國要建立良好中英關係同時，喺《中英聯合聲明》下有義務履行承諾為香港政治民主發聲。係咪真係做得到，大家即管拭目以待。