喺電影《古惑仔》入面，陳浩南響銅鑼灣打生打死做大佬，每日拼命進取，再加上同女朋友細細粒(黎姿)一段情，成為唔少香港人嘅集體回憶。而現實之中，最近出現咗個馬場版o靚仔楠，銅鑼灣就冇佢份，不過力求喺沙田博上位。
話說見習騎師黃皓楠，出道後喺沙田跑過兩次賽事，暫時口碑唔錯，已上名兩次，雖然仍未開齋，不過本周六(21日)o靚仔楠遇上細細粒，彼此為着目標相去，皓楠仔大有機會取得在港首場勝仗。
呢個細細粒當然唔係嗰個細細粒啦，所講嘅係第四場後備補出馬「翡翠寶寶」，呢匹馬今次體重只得1036磅，喺競賽馬嚟講算係細細粒，不過戰鬥力就好唔錯，今季初曾於谷草與「摯友無敵」串Ｑ，「摯友無敵」現評89分，而「翡翠寶寶」只得41分，肯定有利，而且近三仗俱跑第四，可見隻馬狀態不差，尤其上次o靚仔楠初騎，1400米明明嫌長，都只係輸一身位左右，反映人馬合拍，今次爭泥地1200米，過去此程攞過一冠一亞，合適得多，而且今仗隻馬只負104磅輕飄飄，睇嚟o靚仔楠真係有機會做番次揸弗人。