鐵頭仁早前喺白鴿黨黨慶舞劍贈興，技驚四座。咪以為鐵頭仁劍法緩慢，招招看似重複，就當佢亂咁舞。八方聽聞，鐵頭仁真係學過吓劍㗎，佢當晚耍出呢套令人一見噴飯嘅大殺傷力劍法，原來係三十年前所學，源於武當派嘅一套絕密劍法。
事隔咁多年，當晚鐵頭仁其實已經忘記咗大部份嘅招式，八方一介書生，冇學過如來神掌，若果唔係有高人提點，都實在睇唔出鐵頭仁當日所舞動嘅，原來係一套武當派嘅絕學。
八方聽聞，當日鐵頭仁舞劍嘅片段，喺WhatsApp同網絡瘋傳，傳吓傳吓，傳到去當日教佢舞劍嘅師傅輩手機中，高人一睇，仲話估唔到鐵頭仁記性咁好，冇忘記到當日所學嘅招式喎。