向來講嘢幽默嘅「大師」林大輝，噚日開悶到嘔嘅立法會財委會時，聽到保險界議員陳健波批評議員講嘢唔好笑，於是同議員、在場官員講咗個發生係佢身上嘅「笑話」，點解八方要用括號括住笑話呢兩個字呢？因為大師話呢個「笑話」最初係嚇到佢自己出咗身汗，之後先笑到自己合唔埋個嘴。
話說大師噚日一早起身，就如常攞起佢嗰隻兩年前喺西班牙郵輪上面買、索價成幾萬蚊嘅Tag Heuer靚錶睇時間時，點知一睇即時嚇咗自己一跳，為乜解究隻錶上面啲數字全部歪晒嘅？大師第一時間諗，唔通好似有啲人咁，一瞓醒就發現自己隻眼出事？大師同八方講：「當時八點鐘，我自己嚇咗一跳，點解雙眼好似歪咗咁？以為自己變咗鬥雞眼。」
儍強一眼睇出
結果大師拎住隻錶搏命眨眼，之後再定一定神，唔好自己嚇自己，先發覺原來出事嘅唔係自己對眼，而係隻錶嘅錶肉唔知點解真係移晒位，連支計時秒針都甩埋，「我自己都笑咗出嚟，原來係自己嚇自己」。
但最搞笑係，大師係立法會講完呢個「笑話」後，就即時將呢隻壞錶遞畀陳健波睇，但陳健波望咗一大輪，竟然完全睇唔出隻錶有問題！呢個時候財經事務及庫務局局長陳家強行過佢兩個面前，大師就即時攞隻錶畀陳家強睇，今次陳家強係咁意望咗一秒，就即時問大師：「點解隻錶歪晒？」呢個時候大師即場大笑，仲讚陳家強一眼就睇出個問題，對眼仲利過陳健波好多！所以八方提醒各位，以係咪再背後叫陳家強個花名「儍強」，實情唔知幾醒！
李八方
mailto:[email protected]
