機場起第三條跑道單嘢，搞到白鴿黨老鴿、乳鴿內訌，代表白鴿黨講起第三跑嘅單仲偕，因為未有明確反對，仲畀網民揶揄做「單仲膠」，單雞噚日同八方講起呢單嘢，都話有聽過呢個稱呼，佢本人冇乜特別感受，但係就話拗起第三跑都好，大家都起碼要加深了解件事。
所以單雞計劃復活節假前，請反對興建第三跑道嘅天文台前台長林超英、前民航處處長林光宇，同機管局、政府代表嚟一場正反「大辯論」，仲講笑話自己到時唯一要申報嘅利益，就係自己都係機場用家。
至於白鴿黨另一個畀網民鬧嘅人，就係身兼機場管理局董事嘅何俊仁，仁哥話自己一直扮演監察角色，有要求當局要爭取立法會支持，又話如果機管局所作所為同佢立場相違背，佢大不了辭去董事一職，笑言「立法會議員我都辭得，呢個又有乜所謂？」