人人都叫佢「鬍鬚曾」嘅財爺曾俊華，佢入官場開始，已經以一執似足某薯片品牌商標嘅鬍鬚而為人熟識，噚晚佢喺一個有三百幾個大學同中學生出席嘅青年論壇入面，除咗即場同全場玩Selfie，仲公開自己留呢執鬚嘅原因，原來又係同佢鍾意打劍有關。
比賽着「勝利Tee」
財爺話，佢喺中學嘅時候已經好想留鬚㗎啦，直至到上咗大學，成日去學劍，見到個個教練都留晒鬚，「嗰時當佢哋係神一樣」，加上當時每個贏到冠軍嘅選手都有留鬚，「感覺有鬚打劍會好啲」，於是就一直留到𠵱家。
財爺仲話，玩運動嘅人唔多唔少都有啲迷信，而佢自己當時打劍參加比賽嘅時候，最鍾意就係着住同一件T恤，係自己嘅「勝利Tee」。但主持人問到佢件衫有冇洗，佢話笑笑口咁話唔講住，留番下次有機會再講咁話。