曼城（圖），近績英超強隊中最劣，周中敗走巴塞繼續走低，匆匆喺今晚英超早場迎戰守力堅固嘅西布朗，博大冷入球「細」。
近三屆兩度冇英超隊入到歐聯八強，係咪會變常態，言之尚早，短期內又唔會影響到佢哋四個歐聯席位，不用過份擔心。正如英國《天空體育》評論佢哋嘅死因，去到尾段留有一手，話「足球是不斷循環」；有一天，二○○八年全英歐聯決賽、○九年準決賽霸氣包辦三席，準會重現。西甲天王美斯同基斯坦奴朗拿度也會有老退嘅一天，球壇走得快，英超銀彈充足，反撲可期。
曼城對上三屆兩度聯賽封王，但今屆能否穩取前四一席，我諗連中東班主都開始擔心。嚟到季尾，氣勢比排名、對賽往績及傷停問題，都嚟得重要；但曼城除咗歐聯兩負巴塞出局外，喺現時英超前五位中，佢哋氣勢最差，近五戰失咗六分，最銳係阿仙奴同利記，錄得全勝。至於曼城鄰會紅魔，上仗大炒熱刺，踢出今季代表作。鬥入直路，曼城四面楚歌！
英超近年少冧莊，何況曼城近季嘅勝利方程式，「高柏尼＋耶耶托尼＋阿古路」嘅長勝威力，踏入今年快速失效；上周末三主將齊擔正，照0:1輸畀降班熱門般尼，沿用嘅4-4-2陣式亦一沉百踩。藍月敗走魯營，不利消息四起，相隔兩天半，今天便要喺早場面對有「不降領隊」普利斯任教後、近十三戰錄得八戰不失球嘅西布朗，呢個1.2倍主W唔係穩執。
客軍擁前線兩把尖刀伊迪耶及比拉希奴，喺中下游球隊少見，牽制力極強；而西布朗撇開接連兩負易帥後變身嘅維拉，今年戰績對比上半季實進步極大，而且護級未坐穩船，今季賽程最後五戰要四鬥前列隊，求快上岸，戰意必盛。唔敢膽大到博曼城再敗，但以狀態及值博率論波，可冷博入球「細」及保守啲1:0及1:1波膽。
另外兩場亦博冷門，英超吼「黑貓」新特蘭換帥後即反底，作客到「散晒」嘅韋斯咸開和局或受讓半/一下盤。至於上周英冠精選，最銳嘅屈福特，已升上榜首；今天迎葉士域治，有另一射手恩哈路隨時候命，熱W穩開，或冷博小勝一球，取三連捷歡度國際賽帶來嘅空檔。
波神
神級攻略 智破足彩