【本報訊】基本法委員會委員陳弘毅建議港府，委託前法官就政改主持大型民調，並與泛民進行政改電視辯論，除遭港府大潑冷水，全國港澳研究會副會長劉兆佳也說，電視辯論對港府並無好處，過去政府搞電視辯論，已證明是「好痛苦嘅經驗」，更直言目前政改通過的機會只有百分之五。
記者：呂浩然
曾任中策組首席顧問的劉兆佳，昨日談及陳弘毅建議時，以上屆政府搞電視辯論的經驗，形容當日前特首曾蔭權與余若薇進行政改辯論，「對政府嚟講係一個好痛苦嘅經驗」，因為「你再整場辯論，贏咗冇乜特別意義，如果輸咗的話仲可能令到出現難以預計嘅民意轉變嘅時候，可能仲弊傢伙㖭」。
劉兆佳又相信，港府進行大型民調的成事機會不大，因為泛民不願意受結果綑綁，「一路做開嗰啲民意調查都至低限度有某種多數支持政府方案通過，咁佢（泛民）都唔肯接受嘅時候，你點解接受一個綑綁自己、束縛自己嘅民意調查結果嚟令自己難以向自己核心支持者交代呢？」劉又估計，目前政改通過的機會僅百分之五，亦認為泛民每日都在盤算政治得失問題，故不排除有人會在最後關頭改變立場。
曾鈺成：勿辜負陳弘毅苦心
民建聯葉國謙也表明，對陳弘毅的提議興趣不大。經常引述民調結果勸泛民轉軚的葉稱，大型民調「對建制派冇乜意思」，「因為建制派一早已表明會支持政改方案」，又明言不會因民調有逾半數市民反對通過政改，而要求撤銷人大八三一決定，「呢啲根本我哋唔會考慮」。
不過立法會主席曾鈺成支持陳建議，形容他對政改問題非常熱心，「我希望各方面都，大家都睇到陳教授嘅一片苦心，唔好辜負咗佢」，曾又表示，陳弘毅的提議是否行得通屬次要，重要的是陳想盡辦法希望促成政改通過，可見社會上有很強的意願冀政改成事，「無論特區政府、中央政府、以至我哋立法會泛民、各黨派嘅同事，大家都好似教授一樣咁積極、主動使到方案過到」，相信「有心自然有辦法」。