前教育署長，教統局常任秘書長羅范椒芬女士是當今政壇紅人，行政會議成員，得特首信任的忠心梁粉，所以每逢羅范就大事發言，香港社會必定矚目。
最近羅范再次語出驚人，接受鳳凰網訪問時講到明，為增強港人對國家認同感，當局應考慮在師訓班加入國情教育，例如到內地上課一個月學習國情，上課係「必修」，作為教師入職條件之一。
講得真恐怖，吳克儉上任為教育局局長之初，已有唔少人笑稱教育經驗比較少嘅吳克儉係台前局長，受台後前教統局局長李國章及羅范指揮，等同教育局復辟至董建華時期。係唔係咁，冇人知，之不過李國章對教育比較少發言，羅范仍樂此不疲，令人疑惑佢是否真的要推動吳克儉做吓嘢。
同屬建制派，經常與教協意見不同嘅教育評議會副主席何漢權就不以為然，佢直指羅范當年推動教育改革，直接或間接令中史在學校少人修讀，羅范須要承認過失。咪係囉，自佔領、佔中之後，建制派人士不斷批評通識教育科「誤導學生」，指學生不懂中國歷史，失去民族感情，葉劉淑儀又主張在中學恢復中國歷史科，撥亂反正。何漢權就夠老實嘞，董特首時期，邊個政策局堅持教育改革，以通識教育作為必修科呀？咪係由李國章羅范椒芬執掌嘅教統局囉。羅范可能因為當年過於勇進，而今知道種下「禍根」，故此矯枉必須過正，要本港師訓班學生到內地上課一個月學習國情，如果佢冇教改呢一單，今天可能冇咁激。
羅范女兒在美國接受精英中學大學教育，令人羨慕，希望佢女兒嘅中文、中國歷史、中國文化知識能夠好過本港DSE及格程度。但即使羅范建議得以實行，效果未必如羅范所期望嘅。香港教育學院或中大港大嘅教育文憑班學生去到北京上課一個月，會學到啲乜？老師會教啲乜？一味教1980後嘅中國經濟發展歷史，稱譽改革開放？敢唔敢講國共內戰、中共黨史、三反五反大躍進及文化大革命？一講就一疋布咁長，一個月課程講唔晒，內地教授若講到支吾以對，可能成為反面教材，等香港準老師害怕吃驚㖭，返到嚟香港對中國更無好印象。羅范未同內地「黨校」傾清楚課程內容之前，唔好噏得出就噏呀。