坐地鐵，某站上來一群六七歲至十歲的小孩，由老師帶隊。我問身邊兩個小男孩，是去旅行抑或參觀呀？
他倆有點害羞，一個道：「我哋去整嘢食。」
「哦，烹飪班。整乜呢？」
「整糕。」
問一問答一答，不夠爽。我便激將法：「整糕好難㗎，你哋真係識？我唔信！」
為了證實自己的能力，小男孩「爭相」發言了。
「唔難！我哋整好似蘿蔔糕咁，不過唔係用蘿蔔係用菜。」
「搓圓咗，之後㩒扁佢，然之後去煎。」
「佢呀，煎到燶晒！」
「媽咪叫唔好食，會病，我哋都聽話唔食。」
我道：「用手搓圓又㩒扁？有冇污糟手仔呀？」
「有洗手先㗎。你睇我對手幾乾淨！」
「真係有洗手，唔呃人！」
──當我看到他們黑白分明濃如點墨的雙目，眼神天真誠懇，攤開小手，強調不受污染潔身自愛不會呃人，我很感動，孩子都是如此成長的，看父母老師的言教身教。你會聯想到日後遭家暴遭辱罵遭狠辣對付，一些𠝹手自殘堅決出走的畫面嗎？