日聯開「咧」冇耐戰情已經十分之精采，我哋個日籍五人隊經理仲專程飛返去睇今周比賽，噚日電聊問開橫濱水手對鳥棲砂岩（圖）場波，佢即刻話水手點讓得起鳥棲，前者開季打咗兩場，越嚟越曳，周中「夫添」打日聯盃照輸畀仙台，又彌補唔到主力中村俊輔缺陣影響。
相反鳥棲連贏三場，上周仲砌低上季三冠王大阪飛腳，陣中韓援金民友繼續攻守兼顧，向來守得嘅鳥棲以咁好狀態去應戰，「讓球主客和」「客勝」應該冇走雞。
至於聽日場英超大戰利物浦對曼聯一於吼角球「細」，眼利朋友應該都睇到曼聯近三場都係得五、六個角球，事關雲高爾最近更着重左腳翼鋒打右邊，右腳翼鋒打左邊，啲傳中十之八九都係四十五度吊埋去，後衞睇住啲波迎面而嚟梗係向前頂啦，點會清出底線。利記近六場都係角球「細」，除非個天同你作對，咁就冇計喇！
但有時人算真係不如天算，早兩日話說有隊波因為唔多夠人腳打護級，由於轉會同註冊期過咗，所以只可以用失業球員條例，搵咗一輪終於畀佢哋搵到件非洲入籍兵「嘟嘟」，點知交文件去波總話唔批，球隊職員話個球員二○一三年到𠵱家都冇註冊仲唔係失業球員？點知回覆話佢當年幫元朗升班時以業餘身份註冊，唔係職業球員，又何來失業之有呢？吹脹未？
本地職業領隊
耳聽八方 專收好料