今季NBA常規賽進入最後直路，西岸季後賽資格十拿九穩嘅火箭周四喺主場出戰，當家球星夏登（James Harden）繼續勁，交出個人職業新高嘅五十分，喺一班廿年前幫火箭連贏兩屆總冠軍嘅前輩面前發揮MVP級水準，帶領球隊以118:108輕取金塊。
賀廿年前冧莊總冠軍
為咗慶祝球隊喺廿年前贏到Back-to-back總冠軍，火箭今場特登邀請咗一班當年嘅冠軍功臣撐場（小圖），紀念呢項歷史。眼見「大夢」奧拉祖雲（Hakeem Olajuwon）同德士拿（Clyde Drexler）等名人堂傳奇喺場邊觀戰，夏登梗係不敢怠慢，全場轟入五十分兼搶到十個籃板，為前輩提供最佳娛樂。
歷來單場得分50+嘅火箭球員唔多，夏登對上嗰位已經係十九年前嘅大夢嘞。曾經自稱「第一SG」同球隊「基石」嘅夏登，喺咁多名宿面前突然玩謙虛：「有機會喺佢哋面前比賽，真係榮幸。」小前鋒阿里沙（Trevor Ariza）就以誇張手法讚呢位隊友：「睇落勁輕鬆，佢好似啱啱瞓醒就落場射入五十分咁。」
雖然火箭今場有大前鋒T鍾斯（Terrence Jones）傷出，但佢哋周六嘅對手只係攻不銳守不穩嘅太陽，要贏波應該冇咩難度。相信夏登都想把握機會，繼續為個人首個常規賽MVP拉票。
