對練馬師嚟講，有大馬主揼水不斷買入好馬支持，爭取成績一切變得易辦事，強如大摩當然明白箇中道理，所以服侍啲大馬主愛駒，梗唔可以怠慢。超級富豪蔡志明一對仔女蔡加讚及姐姐蔡加怡，先後買入「車神」及「巨無霸」加盟摩廐，後駒本於今個月1號賽事大有機會取勝，點知賽前大發脾氣退出，搞到加怡當日扁晒嘴之餘，更枉費佢同大摩一番美意。
話說3月1號正正係加讚生日，當日佢冇入場有其他節目，但加怡同就媽咪現身馬場打氣，諗住取得頭馬後即時向加讚報喜兼送上祝福，結果卻跑唔成掃晒興。不過大摩好識做，一周後即安排加讚嘅「車神」出擊，即使贏唔到，但99倍跑第三，位置派323.5元，都算好有誠意。
另一方面，「巨無霸」上次退出無大礙，拼後更特登安排試課大閘，再無扭計起步順利，輕鬆跑個第三，成熟狀態穩步上揚。睇番佢上月中在港初出跑1400米，63倍馬直路風捲殘雲追入季軍，走勢遠比預好，擺明有極高潛質，今次角逐1600米更利追趕，只要乖乖入閘，相信唔難打開勝門，博取靚女馬主蔡加怡一笑。