人大政協兩會結束，港人金睛火眼留意嘅政改問題，北京只係一貫重申好有誠意落實普選、通過政改是「硬任務」，又開動各式宣傳機器，發動游說市民接受袋住先嘅輿論攻勢。泛民不甘示弱，隨即喺上周宣佈成立四人小組抗衡抹黑，解釋袋住先即係袋一世嘅弊病。泛民以往畀人一盤散沙感覺，點解突然變得有隊形？兩場選舉激勵士氣，泛民若然唔再由守變攻，好容易輸甩褲。
有票才可與政府作戰
要同個政府作戰，至少都要手上有票先得；若然本年底區議會選舉慘敗、明年立法會選舉又守唔住三分之一否決權，屆時真係講多無謂。若然喺中央開動大規模輿論機器之時，泛民主派仲唔出擊，真係同坐喺度等死無異。
有泛民中人指，其實民主黨想發動辭職公投，唔多唔少都係有啲攞番輿論主導嘅目標，而呢樣嘢未發生之前，空白期內都唔可以俾阿爺㩒住砌㗎，無論係民心抑或選票都好，近日泛民都較以往更團結同有隊形，據聞即使各黨派之間對唔同問題容易有唔同意見，都未至於各說各話。有泛民中人話，唔同泛民黨派間已經討論政改兩年多，掌握對方看法，另一重點當然係：喺擁有共同敵人情況下，人先會團結囉。