標準工時委員會前日開會，決定研究規定僱主及僱員喺簽合約時必須寫明工時，結果勞工界即炮轟變相將超時工作合法化，但最大鑊係身為個會入面嘅勞方代表、工聯會理事長吳秋北，出嚟回應時竟然話僱主對標時立法有強烈顧慮，反叫勞工界要有耐性慢慢說服資方，唔講仲以為佢係資方說客，事後有聽眾仲打上電台質疑工聯會出賣工人㖭。
八方聽聞工聯會有人聽到佢咁講，都激到紮紮跳，該會榮譽會長陳婉嫻噚日接受電台訪問，就公開「訓示」吳秋北，話佢唔夠經驗應對，若果由佢出馬開會就唔會接受呢個建議，因為建議根本係「呃人」，將合約工時取代標準工時，仲話吳秋北應該提出，先徵詢勞工界意見，嫻姐仲話明要向吳了解吓發生乜事。吳秋北見嫻姐咁講，立即「受教」補飛，話呢個唔係委員會最終建議，又話好認同嫻姐講法咁話。