巴塞隆拿呢種百年老舖，最講求歷史，所以隊長都要論資排輩，佩奧爾上季退休，新任隊長依次就由沙維、恩尼斯達、美斯同布斯基斯咁排，真係夠晒嚴謹。不過隨住中場孖寶開始老化兼傷患，美斯實際擔任隊長次數都好高，美斯今季做咗二十次隊長，巴塞成績就錄十五勝二和三負，咁好腳頭，下周日場國家打吡巴塞迷真係唔介意佢繼續戴臂章。
不過傳統英格蘭球隊，搵隊長最緊要係感染力，明顯美斯喺呢方面真係唔算強，贏波時笑笑口，輸波時頭耷耷，好少見佢出力鼓勵隊友，上季仲有因為要踢世界盃Hea踢、同巴塞教練安歷基今季鬧不和等等傳聞。不過點都好，由球王馬勒當拿開始，阿根廷都係搵最好波嘅做隊長，美斯做慣國家隊隊長，喺巴塞都叫駕輕就熟。
比起巴塞隊長，皇馬隊長似乎更加惡做，皇馬球迷出晒名要求高，隊內又多黨多派，前隊長魯爾之前落得流放去史浩克04下場，現任隊長卡斯拿斯（圖）睇嚟都唔留得耐。聖卡斯又係唔爭氣，歐聯對史浩克發晒夢，幾乎搞到球隊出局，同女主播老婆關係，成日俾人懷疑佢放料畀西班牙傳媒，皇馬上一手教練摩連奴已經雪過佢，𠵱家教練肥安重用佢，都唔叫好過；連主場球迷都噓聖卡斯，對呢位九歲已經加入皇馬青年軍嘅老臣子，真係好心酸。講真，好似卡斯拿斯贏盡錦標咁滯，倒不如放開恩怨，試吓外闖，睇吓呢個世界都好呀。
文：牽牛