禮拜六(21日)沙田八草兩泥賽事，草地用C加3欄，雖然跑道狹窄，不過近兩次都見有得追，轉彎路程守內叠之後追馬表現唔錯，以最近3月8日為例，就有「曦世之寶」、「勝飛」及「魔法豪情」沿途慳完之後，在內欄位置竄上贏馬。至於兩場直路賽，仍然要秤先外檔馬。
今戰列陣馬中，第三場「環保之星」是全場唯一贏過田草C加3欄嘅馬，場地性能唔使懷疑，有力取得今季第三win。另外，尾場「明多多」跑田草C加3欄一次即勝，抽一檔貼欄賺形勢，可食尾糊。
泥地方面，近兩場泥地1800米頭馬「好腳頭」及「雲呢拿」都係後上建功，頭場同程賽事，要吼實上仗泥地追近之「歡欣滿載」。至於泥地1200米一向利前置，第四場擅跑泥地之快馬「快快贏」及「神童」可優先留意。