嚟緊星期日有兩場矚目大戰，分別係巴塞隆拿對皇家馬德里嘅國家打吡，同埋利物浦對曼聯嘅雙紅會。今日《咖喱牛腩》就同大家講吓兩隊嘅隊長；單憑印象，揀隊長通常一係揀最有領袖魅力嗰個，一係就揀最好波嗰個，最理想就係隊長可以帶動全隊，兼提升整體戰鬥力。
不過，隊長最緊要可以服眾，冇隊友支持真係講咩都假，所以有時能力同魅力都係其次，論資排輩先係最緊要，至少喺俾人質疑嗰陣，都可以大聲講句：「N年前我喺度踢波嗰陣，你仲喺邊度邊度執緊波。」利物浦嚟緊下季就會面對換隊長呢個問題，唔少人都認為佐敦軒達臣會接班，但小弟覺得不妨考慮史卡迪爾（圖）。首先史卡資格老，係少有經歷過賓尼迪斯時代嘅球員，又係防線核心，風格夠晒鐵血硬朗，紮住個頭上陣、即場縫針都試過，加埋成個惡漢咁樣，夠晒煞氣！喺謝拉特做隊長前，都係芬蘭中堅希比亞做，所以喺利物浦歷史，外援後防硬漢做隊長都唔係未試過。總覺得軒仔喺資歷方面未夠，不如等佢浸多幾年先都未遲。
至於曼聯就喺今季換咗隊長，由朗尼擔正，雖然朗尼係陣中第一球星，但佢真正上位嘅原因都係資歷，佢喺二○○四年就加盟曼聯，季初嗰陣，係得費查資歷耐過佢，但費查怪病纏身，真係好難搵佢做隊長，所以朗尼就順理成章上位，而唔係外界所傳嘅尹佩斯。
文：咖喱