香港馬主為愛駒改名，最鍾意用「金」、「寶」、「福星」呢啲字眼外，好多時亦會以唔同動物來命名，最常見就「龍」字。今期（21日）第九場二班1200米，就有熊、猴、鷹、鹿，成個動物園咁，分別係「熊英雄」、「靚猴王」、「御皇鷹」及「金鹿」，如果連「龍華太旨」嘅「龍」都計埋，咁就五大靈獸濟濟一堂。
幾匹靈獸之中，邊隻最兇猛戰鬥力最強呢？計今季賽績以「御皇鷹」最勁，已經贏咗四場，但亦因此加分已多，唔係咁易五捷。至於「熊英雄」過去傷患纍纍，不過今季可勤操勤跑，絕對係好現象，可惜佢性能較窄，六捷都係贏1000米直路賽，呢場1200米始終唔係強項。
機會最高可能係馬騮精「靚猴王」，上仗同程排最外嘅12檔，蝕位蝕到儍，兼且舌頭割傷下，都成支箭咁追上跑第五，輸唔夠兩身位；復課操練非常辣，今次更抽個一檔靚位，才四歲係今場五大靈獸中最年輕，進步空間最大，睇嚟其他靈獸幾犀利都好，都打唔過呢位齊天大聖！