行政會議成員兼港區人大代表羅范椒芬一向言論惹火，之前因為建議做老師要返大陸上國情課，已經俾學界狂插，噚日佢上電台，被人問到平反六四問題，又開口夾着脷！
話說三年前羅范仲做緊候任特首辦主管嗰陣，記者問佢關於平反六四嘅問題，佢多數都會表演瞬間黑面同埋避得就避，有次仲話「𠵱家根本冇定性，所以平反咩呢？我都要思考吓」。
講李旺陽耍太極
到噚日佢上電台，又再被問北京對六四定性問題，呢次羅范仲出位，話「六四終歸有一日有個更咩嘅說法」，結果呢句話被網民瘋傳，研究羅范講緊「更咩嘅說法」，其實究竟係咩嘢？
因為羅范冇再解釋落去，所以佢呢句說話真係好值得斟酌，終歸一日即係邊日？佢呢句話完全演繹到講完等如冇講嘅精髓。
除咗講六四講到咩咩聲，佢講到其他事件，譬如李旺陽被自殺、劉霞遭軟禁等，佢又再大耍太極，完全置身事外，好似話李旺陽事件係公說公有理、婆說婆有理；劉霞事件更加因為佢冇接觸過劉霞，所以佢唔評論。