大半生奉獻於大專教育、一手創辦樹仁大學嘅校監胡鴻烈，噚日獲港大頒授名譽社會科學博士學位，表揚佢喺教育界嘅貢獻，九十五歲嘅胡校監雖然年事已高，仍堅持親身領獎，佢話對獲獎好開心，被問到想唔想將獎項送畀愛妻，以為舊年經歷喪妻之痛嘅老人家憶起亡妻會一時感觸，想唔到佢依然露出招牌親切笑容，「想！可以送嘅就會送！」
胡校監噚日領獎，除咗胡家家人，仲有唔少學生校友撐場，胡校監就成為咗拍攝「景點」，人人都爭住同佢影相，長子兼仁大副校長胡耀蘇代佢致辭時話，佢留意到香港法律、政治同高等教育等議題喺舊年十月起再次成為社會焦點，唔知係咪講緊雨傘運動？原來胡校監忙於校務之餘，仍然好關心政局同學生。