愛馬之人要請留意，將於月尾開始公演嘅馬術與劇場匯演《Cavalia》，參與演出嘅靚馬上周已經來港，正加緊練習同埋適應香港又暖又濕嘅天氣，噚日喺記者會上，首度喺香港公開亮相。
四十匹馬匹分兩批運抵香港，馬會派出運馬車隊，協助由機場運送馬匹到中環的白色馬戲棚。
今次匯演集結四十匹靚馬，表演時會同四十位來自世界各地嘅騎師、空中飛人、雜技表演者、舞蹈家、音樂家打造劇場感受，票價由三百九十五元至一千九百九十五元。
今次匯演主要贊助機構馬會，將與Cavalia合辦多項社區活動同教育工作坊，當中包括舉辦五場特別日場，招待一萬名學生同基層市民。